يعني إيه تكسّر حلم ؟؟!
هو الحلم كان إزاز
يعني إيه كل ما افرح تكسّر البرواز
تحرمني حلمى
تغيّرملامح المكان
مَبَقاش مكانى
بس الحيطان هى الحيطان !
سور عالى
يمنع حتى الأغانى
يحرم فراشة تطير
يٍحجب عيون مَليانة حب
مَليانة خير
يِحبس كلامى
يحرق جناح الطير
وتدوب شموع الأمل
من حر شمس الليل
شمس الظلام واليأس
شمس الجحيم الحزين
مهما تمر السنين
لساك تحاول تخطف كَياني
تِقلب ملامحي
تِسرق مكاني
وتقولي لا
مفيش مكان للضحك تانى
لساك تحاول تحرمني فرحى
تفرح بدمعي وتدوس فى جرحي
مالك كدة قاسى وعنيد
شمس النهار جايبة الجديد
حتى لو أنتَ تِمثال حديد
هتسيـــح تـــدوب
و تمـــــوت
ويموت معاك حَبسى
أفتح ببان القفص
تــتــحـرر الأحــــلام
ليلى بدران
No comments:
Post a Comment